नेपालमा एक जनामा कोरोना संक्रमण प्रमाणित, बागलुङ दक्षिण क्षेत्र समेत त्रासमा
२०७६ चैत्र १० । बरेङ । विश्वभर कोरोनाको संक्रमण र मृृत्यु हुनेको संख्या बढे संगै नेपालमा पनि आज एक युवतीमा कोरोना ( कोभिड–१९ ) पोजेटिभ देखिएको खबर प्राप्त भएको छ ।
सोमबार स्वास्थ्य मन्त्री भानुभक्त ढकालले पत्रकार सम्मेलन गरी कोरोना संक्रमित १९ वर्षीय नेपाली विद्यार्थी भएको बताएका छन् । फ्रान्स हुँदै कतारको दोहाबाट चैत्र ४ गते काठमाडांै आएकी युवतीमा आइतबार साँझ शुक्रराज ट्रपिकल तथा सरुवा रोग अस्पतालमा जाँच गर्दा उनमा कोभिड–१९ (कोरोना) लागेको पुष्टि भएको स्वास्थ्य मन्त्री ढकालले बताए ।
नेपालका गाउँ गाउँमा समेत त्रास उत्पन्न भएपछि आज बरेङ गाउँपालिकाको व्यापारिक स्थल बरेङ बजारमा पनि बजारका होटल तथा अन्य व्यवसायहरु बन्द गर्न निर्देशन दिइएको छ ।
इलाका प्रहरी कार्यालय बरेङले आज बिहानै देखि मानिसको आवतजावत कम होस् र होटलहरुमा बढि मानिसहरुको जमघट नहो्स भन्ने हेतुले केही दिनको लागि व्यवसाय बन्द गर्न आह्वान गरिएको बताएको छ ।
