प्रसव पीडामा उद्धार गरिएको महिलालाई पुत्र लाभ, आमा र बच्चाको अवस्था सामान्य
२०७६ चैत्र १० । बरेङ । बागलुङको बरेङ गाउँपालिकाले प्रसव पीडामा रहेकी एक विपन्न महिलाको उद्धार गरेपछि उनलाई पुत्र लाभ भएको छ ।
बरेङ गाउँपालिकाले आर्थिक अभावका कारण उपचार नपाएर छटपटिएकी बरेङ गाउँपालिका वडा नम्बर ३ बाटाकाचौर खाल्ले निवासी अन्दाजी २२ वर्षकी सिता रुचाललाई सम्पूर्ण खर्च व्यहोर्ने गरी उपचारका लागि एम्बुलेन्समा पठाएको थियो । रुचालको अपरेसन बाट बच्चा सकुशल जन्मिएको बताइएको छ ।
लुम्बिनी मेडिकल कलेज प्रवास पाल्पामा अपरेसन गरेपछि आमा र बच्चा दुवैको अवस्था सामान्य रहेको रुचालको उपचार प्रक्रियाका सहयोगी तिलक गाहाले बताए ।
गाउँमा भिडियो एक्सरे सुविधा नभएकाले बाटाकाचौर स्वास्थ्य चौकीले बच्चा उल्टो भएको हुनसक्ने र भिडियो एक्सरे गर्नुपर्ने बताएको थियो । तर आर्थिक अभावका कारण सुत्केरी गराउनु पर्ने महिलालाई भिडियो एक्सरे गर्न तर्फ नलागेर पुनः घर लगिएको थियो ।
मृत्युको मुखमा पुगेकी महिलाको उपचार गरि आमा बच्चा दुवैको ज्यान बचाउनुमा गाउँपालिकाको महत्तपूर्ण भूमिका रहेको छ ।
