प्रचारप्रसारको पर्खाइमा बरेङको छहरखोला झरना
२२ वैशाख ०७८ । केशबराज क्षेत्री, बरेङ । बागलुङ जिल्ला झोलुङ्गे पुलको जिल्ला भनेर विश्वभर चर्चित जिल्ला हो । यो सँगै प्रकृतिले भरिपूर्ण रहेको, अनेकौँ अग्ला चुचुराले सुसज्जित यस जिल्ला भित्र खोला,नाला, वनजङ्गल, धार्मिक स्थल, लोभलाग्दा कुण्ड, दह, होमस्टे र झरना रहेका छन् । तीनै मध्यको एक आकर्षक स्थल हो छहरेखोला झरना ।
बरेङ गाउँपालिकाको वडा नम्बर ४ सल्यान र वडा नम्बर ३ बाटाकाचौरको सीमामा रहेको छहरेखोलामा १ सय, ४५ र २५ मिटर उचाइका तीन वटा झरना रहेका छन् । ४५ र २५ मिटर उचाइ भएका झरना मोटरबाटो निकट पर्दछन् भने १ सय मिटर उचाइको झरनाका लागि भने मोटरबाटो बाट ५०० मिटर पैदल हिड्नुपर्ने हुन्छ । यीनै झरना प्रचारप्रसारको कमीले छाँयामा परेका छन् । खोलामा ठूलो ढुङ्गामा ३ मिटर गहिराइ सम्मको गहिरो प्वालले पनि हेरिरहु र रमणीय बनाउँछ ।
अग्ला पहाडबाट हाम फाल्दै झरेको छहरेखोला आफूलाई हुग्दिखोलामा समाहित गराउँदै बढिगाड हुँदै कालीगण्डकी नदीमा बग्छन् । सार्वजनिक यातयातमै झरना नजिक पुग्न सकिने सोही ठाउँमा पैदल यात्रा झन रमणीय हुने गर्दछ ।
पर्यटकीय हिसाबले उच्च सम्भावना बोकेको यो झरना सोही स्थानका वासिन्दाहरुमा मात्रै सीमित रहेको छ । बागलुङ जिल्लाको दक्षिण भेग, गुल्मी जिल्लाको पश्चिम भेग चन्द्रकाेट गाउँपालिकाकाे सीमा वारिपारि पर्ने यस झरनाको बारेमा बेखबर छन् प्रायः ।
देशलाई पर्यटकीय स्थलको रुपमा स्थापित गराउने सरकारको प्रयास साथै यस गाउँपालिकाको समेत योजना रहेकाले पर्यटकलाई आकर्षण गराउने उपयुक्त स्थल बन्न सक्छ छहरेखोला झरना । प्रचारप्रसारको अभावले ओझेलमा परेको यो झरनामा आन्तरिक पर्यटक भित्रिन थालेपछि भने एकाएक चर्चा कमाउन थालेको थियो । विश्वभर फैलिइरहेको कोरोना भाईरसले गर्दा यस झरना प्रचार हुनबाट भने पछाडि धकेलिदिएको छ ।
प्रचारप्रसार गर्र्दै झरनालाई पर्यटकीय स्थलको रुपमा स्थापना गर्न सकेमा बरेङ गाउँपालिका र वडा नम्बर ४ का गाउँ वासीको आर्थिक स्तर उकास्न समेत टेवा पुग्ने देखिन्छ । तसर्थ पर्यटकीय गन्तव्य र आर्थिक स्तर उकास्नका लागि गाउँपालिकाको समेत समयमा ध्यान जान जरुरी देखिन्छ ।जसरी त्यहाँ स्थानीयलाई आफ्नै गाउँको पर्यटकीय स्थल झरनाको प्रचार गर्न पछि परेकोमा पछुतो भएको छ त्यस्तै पछुतो हुनेछ गाउँपालिकालाई पनि ।
