अखिल नेपाल शिक्षक संघ बडिगाडद्वारा शिक्षक स्वागत तथा सम्मान कार्यक्रम

११ भदौ २०८१ । बडिगाड । अखिल नेपाल शिक्षक संघ बडिगाड गाउँपालिकाद्वारा शिक्षक स्वागत तथा सम्मान कार्यक्रम सम्पन्न भएको छ ।

बागलुङ जिल्लाको बडिगाड गाउँपालिका शिक्षक संघले एक कार्यक्रमका बिच सोमबार शिक्षण सेवाबाट अवकाश प्राप्त ५ जना शिक्षकलाई सम्मान तथा बिदाइ,  प्राथमिक तह द्वितीय श्रेणीमा बढुवा हुने ३ जना शिक्षकहरूलाई सम्मान र शिक्षक सेवा आयोगबाट विभिन्न तहमा स्थायी भै बडिगाड गाउँपालिकामा आएका शिक्षकहरूलाई स्वागत गरेको हो ।

कार्यक्रममा पेसागत हकहितका लड्न, शिक्षण पेसालाई मर्यादित बनाउन, इमान्दार भै शिक्षण गर्न अनुरोध गर्दै नेकपा मसाल जिल्ला प्रवक्ता मेकबहादुर पाईजा, राष्ट्रिय जनमोर्चा जिल्ला सदस्य तथा  बडिगाड १ का वडा अध्यक्ष बोमबहादुर थापा, बडिगाड गाउँपालिकाका उपाध्यक्ष भीमसेन वन लगायतले मन्तव्य व्यक्त गरेका थिए ।

अखिल नेपाल शिक्षक संघ  जिल्ला समिति अध्यक्ष मित्रदत्त ढकालको प्रमुख आतिथ्यता,शिवलाल वनको अध्यक्षता रहेको कार्यक्रम केहरसिङ सिंजालीको संचालनमा  सम्पन्न भएको हो ।